ราชา อาห ภนฺเต นาคเสน พุทฺโธ อตฺถีติ ฯ อาม มหาราช ภควา
อตฺถีติ ฯ สกฺกา ปน ภนฺเต นาคเสน พุทฺโธ นิทสฺสิตุํ อิธ วา อิธ วาติ ฯ ปรินิพฺพุโต
มหาราช ภควา อนุปาทเสสาย นิพฺพานธาตุยา น สกฺกา ภควา นิทสฺเสตุํ อิธ วา
อิธ วาติ ฯ อุปมํ กโรหีติ ฯ ตํ กึ มญฺญสิ มหาราช มหโต อคฺคิขนฺธสฺส ชรมานสฺส
ยา อจฺฉิ อตฺถงคตา สกฺกา สา อจฺฉิ นิทสฺเสตุํ อิธ วา อิธ วาติ ฯ น หิ ภนฺเต
นิโรธา สา อจฺฉิ อปฺปญฺญตฺตึ คตาติ ฯ เอวเมว โข มหาราช ภควา อนุปาทิเสสาย
นิพฺพานธาตุยา ปรินิพฺพุโต อตฺถงฺคโต น สกฺกา ภควา นิทสฺเสตุํ อิธ วา อิธ วาติ
ธมฺมกาเยน ปน มหาราช สกฺกา ภควา นิทสฺเสตุํ ธมฺโม หิ มหาราช ภควตา
เทสิโตติ ฯ กลฺโลสิ ภนฺเต นาคเสนาติ ฯ

พุทฺธนิทสฺสนปญฺโห ทสโม ฯ

ปญฺจโม วคฺโค ฯ

ฉฏฺฐวคฺโค

ราชา อาห ภนฺเต นาคเสน ปิโย ปพฺพชิตานํ กาโยติ ฯ เถโร อาห น
โข มหาราช ปิโย ปพฺพชิตานํ กาโยติ ฯ อถ กิสฺส นุ โข ภนฺเต เกฬาเยถ มมาเยถาติ
ฯ อตฺถิ ปน เต มหาราช กทาจิ สงฺคามคตสฺส กญฺฑสตฺติปฺปหาโรติ ฯ อาม ภนฺเต
อตฺถีติ ฯ กึ นุ โข มหาราช โส วโณ อาเลเปน จ อาลิมฺปิยติ เตเลน จ มกฺขิยติ
สุขุเมน จ โจฬปเฏน ปลิเวฐิยตีติ ฯ อาม ภนฺเต อาเลเปน จ อาลิมฺปิยติ เตเลน
จ มหฺขิยติ สุขุเมน จ โยฬปเฏน ปลิเวฐิยตีติ ฯ กินฺนุ โข มหาราช ปิโย วโณ
เยน จ อาเลเปน อาลิมฺปิยติ เตเลน จ มกฺขิยติ สุขุเมน จ โจฬปเฏน
ปลิเวฐิยตีติ ฯ น โข ภนฺเต ปิโย วโณ อปิ จ มํสสฺส รุหนตฺถาย อาเลเปน จ
อาลิมฺปิยติ เตเลน จ มกฺขิยติ สุขุเมน จ โจฬปเฏน ปลิเวฐิยตีติ ฯ เอวเมว โข
มหาราช อปฺปิโย ปพฺพชิตานํ กาโย อนชฺโฌสิตา ปพฺพชิตา กายํ ปริหรนฺติ
พฺรหฺมจริยานุคฺคหาย อปิ จ วณุปโม กาโย วุตฺโต ภควตา เตน ปพฺพชิตา วณมิว
กายํ ปริหรนฺติ อนชฺโฌสิตา ฯ ภาสิตํ เจตํ มหาราช ภควตา
อลฺลจมฺมปฏิจฺฉนโน นวทฺวาโร มหาวโณ
สมนฺตโต ปคฺฆรติ อสุจิ ปูติคนฺธิโกติ ฯ
กลฺโลสิ ภนฺเต นาคเสนาติ ฯ

กายอปฺปิยปญฺโห ปฐโม ฯ

ราชา อาห ภนฺเต นาคเสน พุทฺโธ สพฺพญฺญู สพฺพทสฺสาวีติ ฯ เถโร อาห
อาม มหาราช ภควา สพฺพญฺญู สพฺพทสฺสาวีติ ฯ อถ กิสฺส ปน ภนฺเต นาคเสน
สาวกานํ อนุปุพฺพสกฺขาปทานิ ปญฺญาเปสฺสตีติ ฯ เถโร อาห อตฺถิ ปน มหาราช โกจิ
เวชฺโช โย อิมายํ ปฐวิยา สพฺพเภสชฺชานิ ชานาตีติ ฯ อาม ภนฺเต อตฺถีติ ฯ
กึ นุ โข มหาราช โส เวชฺโช คิลานกํ นรํ อสมฺปตฺตกาเล เภสชฺชํ ปาเยติ อุทาหุ
สมฺปตฺเตติ ฯ สมฺปตฺเต ภนฺเต คิลานกํ นรํ เภสชฺชํ ปาเยติ โน อสมฺปตฺเตติ ฯ